देश

पोद्दार आयुर्वेदिक महाविद्यायातील भयंकर प्रकार… निष्काळजपणामुळे विद्यार्थ्याचा बळी

मुंबईतील पोद्दार आयुर्वेदिक महाविद्यायातील भयंकर प्रकार समोर आला आहे. हॉस्पिटल प्रशासनाच्या निष्काळजपणामुळे पोद्दार महाविद्यालयात शिकणाऱ्या विद्यार्थ्याचा बळी गेला आहे. दरम्यान, जाब विचारत विद्यार्थ्यांनी हॉस्पिटल ओपीडी बंद केली आहे. त्यामुळे येथे तणावाचे वातावरण आहे.

मुंबईतील वरळी येथील पोद्दार आयुर्वेदिक हॉस्पिटलमध्ये BAMS ला शिकणाऱ्या धाराशिव येथील दयानंद काळे (22) या विद्यार्थ्याला त्याच हॉस्पिटलमधील सेवा अभावी आणि तत्परता दाखवली नसल्याने आपला जीव गमवावा लागला आहे. रात्री झाडावरुन पडून त्याच्या डोक्यात गंभीर दुखापत झाली होती. मात्र या विद्यार्थ्यावर वेळत उपचार मिळू शकलेले नाहीत, असा आरोप करण्यात आला आहे. रुग्णालय प्रशासनाच्या निष्काळजीपणामुळे या विद्यार्थ्याचा जीव गेला आहे, असा आरोप करत विद्यार्थी आक्रमक झालेत. त्यांनी रुग्णालयावर धडक मारली.

दुसरीकडे, विद्यार्थ्यांनी आणि पालकांनी आरोप केला आहे. वैद्यकीय महाविद्यालयात मुले सुरक्षित नसल्याचे सिद्ध होत आहे. या प्रकाराविरोधात विद्यार्थ्यांच्यामध्ये असंतोष असून डिन यांनी त्या जखमी विद्यार्थ्यांसाठी साधी रुग्णवाहिका उपलब्ध करुन दिली नाही. तसेच उपचारासाठी त्याला स्पर्श देखील केला नाही. वेळेवर उपचार न मिळाल्याने या विद्यार्थ्याचा हकनाक बळी गेला आहे, असा आरोप करण्यात आला आहे.

एक प्रतिष्ठित शासकीय आयुर्वेदिक महाविद्यालय
आर ए पोदार आयुर्वेद वैद्यकीय महाविद्यालय हे महाराष्ट्रातील एक प्रतिष्ठित शासकीय आयुर्वेदिक महाविद्यालय आहे. पोदार आयुर्वेद वैद्यकीय महाविद्यालय मुंबई या नावाने प्रसिद्ध असलेले हे महाविद्यालय 1941 मध्ये स्थापन झाले आहे. RAPAMC मुंबई हे महाराष्ट्र आरोग्य विज्ञान विद्यापीठ, नाशिकशी संलग्न आहे आणि केंद्रीय भारतीय औषध परिषदेने मान्यता दिली आहे. पोदार आयुर्वेद वैद्यकीय महाविद्यालय भारतातील आयुर्वेदासाठी सर्वोत्तम संस्था म्हणून ओळखले जाते. त्यामुळे या महाविद्यालयात शिक्षण घेण्यासाठी विद्यार्थ्यांचे प्राधान्य असते. येथे चांगल्या सोयी-सुविधा देण्यात आलेल्या आहेत.