देश

५ राज्यात १६ कोटी मतदार बजावणार मतदानाचा हक्क

उत्तर प्रदेश, पंजाब, गोवासह पाच राज्यांचा विधानसभा निवडणूक कार्यक्रम निवडणूक आयोगाने जाहीर केला आहे. मुख्य निवडणूक आयुक्त नसीम झैदी यांनी पत्रकार परिषदेत याची घोषणा केली. उत्तर प्रदेश, गोवा, पंजाबसह इतर राज्यांच्या निवडणुकीकडे देशाचे लक्ष लागले आहे. या निवडणुकीत १६ कोटी मतदार मतदानाचा हक्क बजावणार आहेत.
निवडणुकीच्या तयारीचा आढावा घेण्यासाठी मंगळवारी निवडणूक आयोगाने या राज्यांच्या मुख्य निवडणूक अधिकाऱ्यांच्या बैठकीचे आयोजन केले होते. या वेळी मणिपूरमध्ये नागा बंडखोरांकडून होत असलेल्या हिंसाचार व कायदा सुव्यवस्थेवर चर्चा करण्यात आल्याचे सूत्रांकडून समजते. त्याचबरोबर कर्मचाऱ्यांची नियुक्ती, सुरक्षा, मतदान यंत्र आणि आचारसंहितचे कठोर पालन करण्यावरही चर्चा झाली. गृह मंत्रालय या पाच राज्यांमध्ये निवडणुकीदरम्यान सुमारे ८५ हजार सुरक्षा कर्मचारी तैनात करणार आहे. त्याचबरोबर विविध १०० सुरक्षा कंपन्यांची मदतही घेतली जाणार आहे. यामध्ये राज्य सशस्त्र बल आणि भारतीय राखीव बटालियनचाही समावेश असेल.