देश
शिक्षकाच्या जाचाला कंटाळून १४ वर्षीय विद्यार्थ्याची आत्महत्या
फी भरण्यासाठी सतत शिक्षकाने लावलेल्या तगाद्याला कंटाळून १४ वर्षीय विद्यार्थाने गळफास घेऊन आत्महत्या केली आहे. वसईमध्ये वालीव पोलिस स्टेशनच्या हद्दीत हा धक्कादायक प्रकार घडला आहे. आत्महत्या केलेल्या मुलाचे नाव अजय दुबे असे आहे. तो आदर्श चाळीत आई-बाबा आणि लहान भावासह राहत होता. वडिल टॅक्सी चालक आहेत. पोलिसांनी अपघाती मृत्यूची नोंद केली आहे पण सुसाईड नोटमुळे शाळेत विचारपुस सुरु आहे.
येथील खैरपाडामध्ये असलेल्या एका नामांकित शाळेतील शिक्षकावर आठवीच्या मुलाला आत्महत्या करण्यास प्रवृत केल्याचा आरोप आहे. पोलिसांना घटनास्थळावर सुसाईड नोट मिळाली आहे. त्यामध्ये आत्महत्या केलेल्या विद्यार्थाने शिक्षकाला कारणीभूत ठरवले आहे. मृत्यू पावलेल्या मुलाच्या वडिलांचा आरोप आहे की, ‘पोलिस कारवाई करण्याऐवजी सुसाईड नोट समोर लपवून शाळेचा बचाव करण्याचा प्रयत्न करत आहे.’
पोलिसांनी दिलेल्या माहितीनुसार, आठवीमध्ये शिकणारा अजय अभ्यासात हुशार होता. शुक्रवारी शिक्षकाने लवकरात लवकर फी भर, अन्यथा परिक्षेत बसू देणार नाही असे अजयला सांगितले. त्यानंतर त्याने ही गोष्ट वडिलांच्या कानावर घातली. वडिल शिक्षकाला भेटण्यासाठी शाळेत गेले, मात्र शिक्षक भेटले नाहीत. सोमवारी अजय शाळेत जाऊन दुपारी एक वाजता घरी परतला. वडिल कामानिमित्त घराबाहेर गेल्यानंतर सायंकाळी सात वाजता आजयने गळफास घेऊन आत्महत्या केली.
