अभिनेते मकरंद अनासपुरे यांचा ‘गल्लीत गोंधळ दिल्लीत मुजरा’ हा चित्रपट तुम्ही पाहिला आहे का? जर हा चित्रपट पाहिला असेल तर त्यामधील एका दृश्यात मकरंद अनासपुरे निवडणुकीचा अर्ज दाखल करण्यासाठी चिल्लर घेऊन आल्याचे पहायला मिळते. असाच चित्रपटातील प्रसंग नाशिकमध्ये घडला आहे. एकदम फिल्मी. नाशिकमधील एका अपक्ष उमेदवाराने निवडणुकीचा अर्ज दाखल करण्यासाठी तब्बल दहा हजाराची चिल्लर आणली आहे.

२९ एप्रिल रोजी नाशिकमध्ये लोकसभा निवडणुकीसाठी मतदान होणार आहे. त्यासाठी उमेदवार अर्ज दाखल करत आहेत. आज मंगळवारी नाशिकमधील शिवाजी वाघ यांनी अपक्ष उमेदवारी अर्ज दाखल केला. नामनिर्देशन पत्र दाखल करताना शिवाजी वाघ यांनी दहा हजार रूपयांची चिल्लर आणली होती. पाच वाजेपर्यंत उमेदवारी अर्ज दाखल करू शकतात. तीन वाजता शिवाजी यांनी दहा हजार रूपयांच्या चिल्लरसह अर्ज दाखल करण्यास सुरूवात केली. दहा हजारांची चिल्लर मोजता मोजता आधिकारी चांगलेच घामेघुम झाल्याचे पहायला मिळाले. दिवसाखेर आधिकाऱ्यांनी सर्व चिल्लर मोजून शिवाजी वाघ यांचा उमेदवारी अर्ज घेतला.

देशभरात सध्या निवडणुकीचा प्रचार शिगेला पोहचला आहे. नाशिकमध्ये २९ तारखेला मतदान होणार आहे. त्यामुळे सर्व पक्षाचे आणि इतर इच्छुक उमेदवार अर्ज दाखल करत आहे.