देश
कपड्यांच्या दुकानातील ट्रायल रुमध्ये छुपा कॅमेरा, मालकासह दोघे अटकेत
नागपुरातला सीताबर्डी हा बाजारपेठेचा भाग आहे. या ठिकाणी असलेल्या एका कपड्याच्या दुकानातल्या ट्रायल रुममध्ये छुपा कॅमेरा असल्याचा प्रकार समोर आला. एका तरुणीच्या सतर्कतेमुळे हे प्रकरण समोर आले आहे. दुकानमालक आणि एका कर्मचाऱ्याला या प्रकरणी अटक करण्यात आली. या दोघांविरोधात गुन्हाही दाखल करण्यात आला आहे.
नागपुरातल्या सीताबर्डी भागात फ्रेंड्स गारमेंटस नावाच्या कपड्याच्या दुकानातील चेजिंग रुममध्ये छुपा कॅमेरा असल्याची बाब १७ वर्षांच्या तरुणीच्या लक्षात आली. ही तरुणी दुकानात तिच्या मैत्रिणीसोबत कपडे खरेदीसाठी गेली होती. आवडलेले कपडे ट्राय करण्यासाठी जेव्हा ती चेंजिंग रुममध्ये गेली तेव्हा तिथे एका कोपऱ्यात तिला मोबाइल लपवलेला तिला दिसला. त्या तरुणीने तो मोबाईल काढून पाहिला तेव्हा तिला त्यात तिला स्वतःचेच कपडे बदलतानाचे चित्रीकरण दिसून आले. या प्रकरणी या तरुणीने हिंमत करुन दुकानदाराला जाब विचारला. मात्र दुकानमालकाने आणि तिथल्या कर्मचाऱ्याने तिला घाबरवण्याचा प्रयत्न केला. ज्यानंतर या तरुणीने पोलिसात धाव घेतली.
पोलिसांनी या तक्रारीची दखल घेतली. या दुकानात काम करणारा निखिल उर्फ पिंटू या सेल्समननेच छुपा कॅमेरा चेजिंग रुममध्ये लपवल्याची माहितीही पोलिसांनी दिली. गेल्या काही दिवसांपासून तो चेंजिंग रुममध्ये कपडे ट्राय करणाऱ्या महिलांचे आणि मुलींचे चित्रीकरण करत होता. याप्रकरणी पिंटू आणि दुकान मालक दोघांनाही अटक करण्यात आली आहे.
