नवी मुंबई महापालिका निवडणुकीच्या पार्श्वभूमीवर राजकारण तापत असताना त्यात आणखी एका मुद्दय़ाची भर पडली आहे. नगर भूमापन ठाणे यांनी सारसोळे गावचे नगर भूमापन मोजणी १२ मार्चपासून सुरू करण्याचे ठरविले आहे. याला ग्रामस्थांनी विरोध दर्शवला असून फक्त गावचे भूमापन न करता गावठाण विस्ताराचेही भूमापन सर्वेक्षण करण्याची मागणी केली आहे. त्यामुळे अनेक निवडणुकांत कळीचा ठरणारा गावठाण सर्वेक्षण हा मुद्दा आता पेटणार असल्याचे दिसत आहे.

नवी मुंबईतील मूळ गावठाणे व गावठाण विस्तार यांचा सव्‍‌र्हे झालेला नाही. त्यामुळे गावठाण विस्ताराचा प्रश्न गेली अनेक वर्षांपासून प्रलंबित आहे. नुकत्याच झालेल्या विधानसभा निवडणुकीपूर्वी बेलापूर गावठाण व गावठाण विस्ताराबाबतचा सव्‍‌र्हे करण्याचा प्रयत्न झाला होता. या वेळी नवी मुंबईतील मूळ ग्रामस्थांनी याला तीव्र विरोध केल्याने सर्वेक्षण बारगळले होते.

आता नवी मुंबई महापालिकेची निवडणूक तोंडावर आली आहे. त्यात नुकतेच नगर भूमापन अधिकारी ठाणे यांच्यामार्फत सारसोळे गावचे नगर भूमापन मोजणी १२ मार्चपासून सुरू करण्याचे पत्र देण्यात आले आहे.

४८ वर्षांपासून नगर विस्तारित गावठाणातील शहर सर्वेक्षणाचा प्रश्न प्रलंबित आहे. १२ मार्चपासून होणारे सर्वेक्षण हे फक्त गावापुरते न राहता गावठाण विस्ताराचेही भूमापन होणे गरजेचे असल्याचे मत ग्रामस्थांचे आहे. त्यामुळे या भूमापनालाही २९ गावांमधून विरोध होणार आहे. नवी मुंबई विकसित करण्याकरिता येथील प्रकल्पग्रस्तांनी त्यांच्या १०० टक्के जमिनी सिडकोस दिल्या आहेत. त्यामुळे त्यांनी गरजेपोटी बांधलेल्या घरांचेही भूमापन सर्वेक्षण केले पाहिजे, ही ग्रामस्थांची भूमिका आहे.

सारसोळे ग्रामस्थांनी मोजणीच्या दिवशी उपस्थित राहून आपापल्या जागेच्या हद्दी दाखवून मोजणीस सहकार्य करावे, असे आवाहन या पत्राद्वारे करण्यात आले आहे. गावठाण विस्ताराच्या मोजणीबाबत संबंधित विभागाने पत्रात सुधारणा करीत गावठाण व गावठाणापासून २०० मीटर असे नमूद करण्यात आले होते, परंतु त्याऐवजी फक्त गावठाण परिसीमेतील असे वाचावे, असेही या पत्रात नमूद करण्यात आले आहे. त्यामुळे ग्रामस्थांनी गावठाण विस्ताराचे सर्वेक्षण व मोजणी होणार नसेल तर गावातील भूमापन मोजणी होऊ देणार नसल्याची भूमिका घेतली आहे.

याबाबत ठाणे नगर भूमापन अधिकारी दत्तात्रय सहारे यांना संपर्क केला असता होऊ शकला नाही.

Service Unavailable

The server is temporarily unable to service your request due to maintenance downtime or capacity problems. Please try again later.

Additionally, a 503 Service Unavailable error was encountered while trying to use an ErrorDocument to handle the request.