देश
होळीसाठी स्वदेशी वस्तूंना मागणी
होळी अवघ्या चार दिवसांवर येऊन ठेपली आहे. परंतु करोना आजाराच्या प्रादुर्भावामुळे चिनी वस्तूंच्या आयातीवर भारतात निर्बंध घालण्यात आल्याने होळीत दरवर्षी सहज मिळणाऱ्या चिनी वस्तू बाजारातून गायब आहेत. याचा फायदा स्थानिक व्यापाऱ्यांना होत असून स्वदेशी वस्तूंना मागणी वाढली आहे.
रंगपंचमी येताच दरवर्षी बाजारात चिनी बनावटीच्या पिचकाऱ्या, मुखवटे यासह अनेक प्रकारच्या वस्तू भारतातच्या बाजारात येतात. मात्र यंदा चीनमध्ये करोनाचा प्रभाव असल्याने भारतात चिनी मालाच्या आयातीवर निर्बंध घालण्यात आल्याने बाजारात या वस्तू बेपत्ता आहेत.
याचा फायदा स्थानिक उत्पादक व व्यापाऱ्यांना होत आहे. इतवारी, महाल, जुना भंडारा रोडवरील ठोक बाजारासह अनेक स्थानिक बाजारात पारंपरिक व नैसर्गिक रंग, फॅन्सी आणि कार्टुन पिचकाऱ्यांनी दुकाने सजली आहेत. यात विविध प्रकारचे मुखवटे, टोप्या, रबर, फोल्डिंग पुंगी व प्लास्टिकचे मास्कही आहेत. होळीचा रंग व पिचकाऱ्यांनाही महागाईचा फटका बसला आहे. दरवर्षी पिचकाऱ्यांच्या रचनांमध्ये काही ना काही बदल होत असतो. यावर्षी सुद्धा पबजीची अधिक क्रेझ दिसून येत आहे. पबजी डिझाईनच्या वस्तूंची मागणी जास्त आहे. रंग व गुलाल दरवर्षीप्रमाणे यंदाही ५ ते १० टक्के महाग झाले आहेत. यावर्षी गन, टँक, सिलिंडर आणि पाईप्ससह कार्टुन व सेलिब्रिटींचे चित्र असणाऱ्या पिचकाऱ्या बाजारात दाखल झाल्या आहेत. पिचकाऱ्यांची किंमत २० रुपयांपासून ५०० रुपयापर्यंत आहे. यात छोटा भीम, टँक, मोटू-पतलू, अँग्री बर्ड, डोरेमॉन, वॉटर गन, शूटर पंप, एअर व मशीन गन सारख्या पिचकाऱ्या मुलांना आकर्षित करीत आहेत. यासोबतच नवनवीन रबर आणि प्लास्टिकच्या हॉरर मुखवटय़ांसह नवीन स्टाईलचे विगसुद्धा बाजारात आले आहेत. आता पंख असणाऱ्या टोप्यांची जागा कॉक कॅपने घेतली आहे. त्या काळ्या, पांढऱ्या, सोनेरी अशा विविध रंगांमध्ये उपलब्ध आहेत. वेगवेगळ्या प्रकारच्या कलरिंग हेअर विग आकर्षणाचे केंद्र ठरत आहेत. मुखवटय़ांमध्ये कमीत-कमी ७० ते ८० आणि टोप्यांमध्ये ६० ते ७० प्रकार उपलब्ध आहेत.
