भिवंडी न्यायालयात सुनावणीसाठी आलेला आरोपी बेसावध असलेल्या पोलिसांच्या हाती तुरी देऊन न्यायालयाच्या आवारातून पसार झाल्याची घटना घडली. सलामत अली अन्सारी असे फरार आरोपीचे नाव असून त्याला बिहारमधून अटक करण्यात आली होती. एका चिमुरडीवर बलात्कार करुन तिची हत्या करण्याचा आरोप त्याच्यावर आहे. या घटनेनंतर पोलिस यंत्रणेत खळबळ उडाली आहे.

पोलिसांकडून मिळालेल्या माहितीनुसार, भिवंडी शहर पोलिस ठाणे हद्दीतील एका चाळीत राहणाऱ्या 6 वर्षीय चिमुरडीवर शारीरिक अत्याचार करण्यात आला होता. त्यानंतर त्या चिमुरडीची हत्या करून तिचा मृतदेह एका बंद असलेल्या खोलीतील बादलीत कोंबून ठेवण्यात आला होता. या प्रकरणातील आरोपी समामत अन्सारी हा नराधम गुन्हेगार पसार झाला होता.

याप्रकरणी शहर पोलिस ठाण्यात हत्येसह पोस्को अंतर्गत दाखल गुन्ह्यात पोलिसांनी 20 सप्टेंबर 2023 रोजी मोठ्या शिताफीने सलामत अली याला बिहार येथून ताब्यात घेत अटक केली होती. त्याच्या विरोधात गुन्हा दाखल असून तो सध्या ठाणे कारागृहात बंदी होता.

पोलिस बेसावध, आरोपी फरार
सोमवारी न्यायालयीन सुनावणीसाठी सलामत अली याला ठाणे कारागृहातून भिवंडी न्यायालयात आणण्यात आले होते. यावेळी सलामत अली याने बंदोबस्तावरील पोलिस बेसावध असल्याचा फायदा घेत न्यायालयाच्या आवारातून पोबारा केला. त्यानंतर बंदोबस्तावर असलेल्या पोलिसांनी परिसरात शोध घेण्यास सुरुवात केली. पण तो आढळून आला नाही.

याप्रकरणी सहाय्यक पोलिस आयुक्त सचिन सांगळे यांच्याशी संपर्क साधला असता त्यांनी गुन्हेगार पळून गेल्याच्या घटनेची पुष्टी केली आहे. या संदर्भात अजून गुन्हा दाखल करण्यात आला नसून पोलिस पसार झालेल्या सलामत अलीचा शोध घेत आहेत.

Service Unavailable

The server is temporarily unable to service your request due to maintenance downtime or capacity problems. Please try again later.

Additionally, a 503 Service Unavailable error was encountered while trying to use an ErrorDocument to handle the request.