देश

शाहरुखच्या ‘बॉब बिस्वास’मध्ये अभिषेक बच्चन

मोठा ब्रेक घेतल्यानंतर अभिनेता अभिषेक बच्चन एका भन्नाट चित्रपटातून प्रेक्षकांच्या भेटीला येत आहे. विशेष म्हणजे या चित्रपटासाठी अभिषेक आणि शाहरुख खान एकत्र आले आहेत. दोघांची जोडी प्रत्यक्ष मोठ्या पडद्यावर झळकणार नसली तरी नुकतीच या चित्रपटाची घोषणा करण्यात आली आहे. ‘बॉब बिस्वास’ या चित्रपटात अभिषेक मुख्य भूमिकेत दिसणार आहे.
‘नोमोशकर, एक मिनट’… हे ऐकल्यानंतर आजही एक चेहरा समोर येतो. तो म्हणजे २०१२मध्ये प्रदर्शित झालेल्या ‘कहानी’ चित्रपटातील ‘बॉब बिस्वास’ याचा. सुजॉय घोषचा ‘कहानी’ हा चित्रपट आजही प्रेक्षकांच्या लक्षात आहे. ही गुढकथा प्रेक्षकांना एका जागी खिळवून ठेवण्यात यशस्वी झाली होती. या चित्रपटातील सर्व पात्रं आजही प्रेक्षकांच्या समोर आहेत. त्यापैकी एक म्हणजे ‘बॉब बिस्वास’. या काल्पनीक पात्राला प्रेक्षकांनी इतकं डोक्यावर घेतलं की या पात्राची सोशल मीडियावर देखील बरीच चर्चा झाली. याच काल्पनीक पात्रावर दिग्दर्शक सुजॉय घोष चित्रपटाची निर्मित करत असून अभिषेक ‘बॉब बिस्वास’च्या भूमिकेत दिसणार आहे.

ट्विट करत शाहरुखनं या चित्रपटाची घोषणा केली आहे. अभिषेकनं देखील या चित्रपटासाठी उत्सुक असल्याचं म्हटलं आहे.