देश
लवकरच दुसरं पॅकेज? पंतप्रधान-अर्थमंत्र्यांची बैठक
करोनामुळे प्रभावित झालेल्या अर्थव्यवस्थेला पुन्हा रुळावर आणण्यासाठी केंद्र सरकारकडून लवकरच दुसरं प्रोत्साहनपर पॅकेज अपेक्षित आहे. पंतप्रधान नरेंद्र मोदी आणि अर्थमंत्री निर्मला सीतारामन यांची याबाबत बैठकही झाल्याची माहिती आहे. पंतप्रधान मोदी, गृह मंत्री अमित शाह आणि निर्मला सीतारामन यांच्यासोबतच्या या बैठकीला अनेक वरिष्ठ अधिकारीही उपस्थित होते.
पंतप्रधान नरेंद्र मोदी यांनी अर्थमंत्र्यांसोबत बैठक घेतली आहे. आता एमएसएमई म्हणजेच सूक्ष्म, लघू आणि मध्यम उद्योग मंत्रालयासोबतही बैठक होणार असल्याची माहिती आहे. या मंत्रालयाकडून देशातील अर्थव्यवस्थेत पुन्हा जीव ओतण्यासाठी एक सादरीकरण केलं जाणार असून आवश्यक उपाययोजना सूचवल्या जाणार असल्याची सूत्रांची माहिती आहे.
पंतप्रधान मोदींनी यापूर्वीच नागरी उड्डाण, कामगार आणि ऊर्जा मंत्रालयासह विविध मंत्रालयांसोबत बैठक घेतली आहे. अर्थव्यवस्था लवकरात लवकर रुळावर आणण्यासाठी आणि देशांतर्गत गुंतवणूकदारांसह परकीय गुंतवणूक आकर्षित करण्यासाठी वाणिज्य मंत्रालयासोबतही बैठक झाली आहे. या बैठकांमध्ये गृह मंत्री आणि अर्थमंत्र्यांचीही उपस्थिती होती.
दरम्यान, लॉकडाऊनमुळे प्रभावित झालेल्या घटकांसाठी सरकारने यापूर्वी १.७० लाख कोटींची मदत जाहीर केली होती. यामध्ये मोफत अन्न वितरण, घरगुती गॅस वितरण, महिलांना अर्थसहाय्य यासह विविध उपाययोजनांचा समावेश होता. सूत्रांच्या मते, सरकार आता मध्यमवर्गीय आणि उद्योग जगतासाठी प्रोत्साहन पॅकेजवर विचार करत असल्याची माहिती आहे.
सरकारने २४ मार्च रोजी राष्ट्रीय लॉकडाऊनची घोषणा केली. यानंतर अर्थव्यवस्था पूर्णपणे बंद होती. दुसऱ्या टप्प्यात लॉकडाऊन ३ मेपर्यंत वाढवण्यात आलं. यामध्ये काही प्रमाणात अर्थव्यवस्था खुली करण्यात आली. तर आता पुन्हा लॉकडाऊन १७ मेपर्यंत वाढवण्यात आलं आहे. लॉकडाऊनमुळे दुकाने, कारखाने, रेल्वे, विमान सेवा यासह अनेक आर्थिक व्यवहार बंद आहेत.
