मुलाच्या गणवेशाचे पैसे मिळाले नाहीत म्हणून ‘तो’ थेट तलवार घेऊन शाळेत पोहोचला!

बिहारमधील अररिया याठिकाणी एक विचित्र घटना घडली आहे. येथील एका व्यक्तीने तलवार घेऊन मुलाच्या शाळेत दहशत माजवली आहे. मुलाच्या गणवेशाच्या पैसे मिळाले नाहीत म्हणून आरोपीनं हे कृत्य केलं आहे. याप्रकरणी शाळेचे मुख्याध्यापक मो. जहांगीर आलम यांनी जोकीहाट पोलीस ठाण्यात फिर्याद दाखल केली आहे. या घटनेचा पुढील तपास पोलीस करत आहेत.

शाळेचे मुख्याध्यापक जहांगीर आलम यांनी दिलेल्या तक्रारीनुसार, आरोपीचं नाव अकबर असून त्याचं घर शाळेच्या जवळच आहे. मुलाच्या गणवेशाचे पैसे न मिळाल्याच्या कारणातून तो शाळेत तलवार घेऊन आला होता. त्याने शिक्षकांना धमकी दिली. हा धक्कादायक प्रकार घडल्यानंतर आलम यांनी जोकीहाट पोलीस ठाण्यात फिर्याद दाखल केली.

विशेष म्हणजे आरोप अकबर याने एक वर्षापूर्वी देखील शाळेत येऊन अशाचप्रकारे धिंगाणा घातला होता. त्यानं शिक्षकांसोबत असभ्य वर्तन करत शाळेतील मुलांच्या दुपारच्या जेवणाचं सामान आणि पैसे जबरदस्तीने मागितले होते. एवढंच नव्हे तर तो शाळेच्या वस्तू चोरून बाजारात विकतो, असा आरोप देखील मुख्याध्यापकाकडून करण्यात आला आहे.

५० हजार रुपयांची मागितली खंडणी
मुख्याध्यापक जहांगीर आलम यांनी पुढे सांगितलं की, या महिन्यात ५ जुलै रोजी मी जीतू चौकातील शालेय वस्तू विक्रेते याकूब यांच्या किराणा दुकानात अंडी खरेदी करण्यासाठी गेलो होतो. यावेळी आरोपी अकबरही तेथे आला. त्याने याकूबकडे ५० हजार रुपयांची खंडणी मागितली. तसेच त्यानं माझ्या खिशातील रोख रक्कम काढून घेतली. यानंतर धमकी देत तो घटनास्थळावरून पळून गेला, असंही आलम म्हणाले.

आरोपीविरोधात गुन्हा दाखल
आरोपी अकबरची मुलं त्याच शाळेत शिकतात, मात्र आजतागायत त्याच्या मुलांना वह्या आणि गणवेशाचे पैसे मिळालेले नाहीत. याच कारणावरून रागाच्या भरात तो तलवार घेऊन शाळेत पोहोचला आणि शिक्षकांना जीवे मारण्याची धमकी दिली आहे. याप्रकरणी जोकीहाटचे पोलीस अधिकारी म्हणाले की, मुख्याध्यापकाकडून लेखी तक्रार मिळाली आहे. आरोपीविरुद्ध एफआयआर दाखल करण्यात आला आहे. घटनेचा पुढील तपास केला जात आहे.