बारामती तालुक्यातील श्री सोमेश्वर सहकारी साखर कारखान्याच्या पंचवार्षिक निवडणुकीच्या निमित्ताने बारामतीच्या राजकारणात आणि पवार कुटुंबात मोठ्या घडामोडी घडताना दिसत आहेत. उपमुख्यमंत्री अजित पवार यांच्या निधनानंतर सहकार क्षेत्रातील ही पहिलीच मोठी निवडणूक असून, पवार कुटुंब प्रथमच आमनेसामने येण्याची शक्यता निर्माण झाली होती. मात्र, ही निवडणूक बिनविरोध व्हावी यासाठी आता पक्षाचे अध्यक्ष शरद पवार यांनी स्वतः पुढाकार घेतला आहे.
Silver Oak Meeting Pawar Family : ‘सिल्व्हर ओक’वर तातडीची बैठक
मुंबईतील शरद पवार यांच्या ‘सिल्व्हर ओक’ या निवासस्थानी सोमेश्वर साखर कारखान्याच्या निवडणुकीच्या अनुषंगाने एक अत्यंत महत्त्वाची बैठक पार पडली. या बैठकीला खासदार सुप्रिया सुळे यांच्यासह खासदार पार्थ पवार, जय पवार आणि युगेंद्र पवार उपस्थित होते. सोमेश्वर सहकारी साखर कारखान्याची निवडणूक बिनविरोध (Unopposed) व्हावी, अशी ठाम भूमिका शरद पवार यांनी या बैठकीत मांडल्याची माहिती समोर आली आहे.
Someshwar Karkhana Yugendra Vs Sunetra Pawar : पॅनेल आणि उमेदवारी अर्जांची परिस्थिती
सध्या कारखान्यावर राष्ट्रवादी काँग्रेस पक्षाचे संचालक मंडळ कार्यरत आहे. मात्र, बदललेल्या राजकीय परिस्थितीनुसार दोन्ही बाजूंकडून स्वतंत्र लढण्याची तयारी सुरू आहे. शरद पवार गटाचे युवा नेते युगेंद्र पवार यांच्या नेतृत्वाखाली इच्छुकांच्या मुलाखती घेण्यात आल्या होत्या. तर दुसरीकडे उपमुख्यमंत्री सुनेत्रा पवार यांच्या नेतृत्वाखाली उमेदवारांच्या गाठीभेटी आणि तयारी सुरू होती. त्याचवेळी भारतीय जनता पक्ष (BJP) आणि एकनाथ शिंदेंची शिवसेना देखील आपले स्वतंत्र पॅनेल उभे करून निवडणूक लढवण्याच्या तयारीत आहे.
Someshwar Karkhana Election : 21 जागांसाठी 514 उमेदवार; 30 सप्टेंबर अंतिम तारीख
सोमेश्वर सहकारी साखर कारखान्याच्या एकूण 21 जागांसाठी तब्बल 514 उमेदवारी अर्ज दाखल झाले आहेत, ज्यामुळे निवडणुकीतील चुरस वाढली आहे. निवडणुकीसाठी उमेदवारी अर्ज मागे घेण्याची अंतिम तारीख 30 सप्टेंबर 2026 आहे.
आता 30 सप्टेंबरपर्यंत शरद पवारांच्या मध्यस्थीला यश येऊन ही निवडणूक खरोखरच बिनविरोध होणार का, की राजकीय पक्ष आपले पॅनेल मैदानात उतरवणार? याकडे सगळ्यांचे लक्ष लागले आहे.
Parth Pawar Photo Controversy : वार्षिक अहवालातील फोटोचा वाद
दरम्यान, कारखान्याने प्रसिद्ध केलेल्या वार्षिक अहवालामध्ये खासदार पार्थ पवार यांचा फोटो छापण्यात आला नव्हता. यावरून शेतकरी कृती समितीचे नेते सतीश काकडे यांनी जोरदार टीका केली होती. मात्र, कारखान्याचे विद्यमान अध्यक्ष पुरुषोत्तम जगताप यांनी याप्रकरणी दिलगिरी व्यक्त करत वादावर पडदा टाकण्याचा प्रयत्न केला होता.
